rahne ko hum qafas mein rahe aashiyan se dur

rahne ko ham qafas meñ rahe āshiyāñ se duur

lekin chaman meñ thī ye jagah āsmāñ se duur

is qurb se jo sajdoñ meñ tujh se huā mujhe

sajde bhī haiñ muqāblatan āstāñ se duur

jitnā maiñ āshiyāñ meñ qafas se qarīb thā

utnā hī ab qafas meñ huuñ maiñ āshiyāñ se duur

hāsil na jis kī ruuh ko ho qurb-e-mai-kada

vo nā-murād rahmat-e-pīr-e-muġhāñ se duur

tujh se bhī duur tak koī aisī jagah nahīñ

mahfil meñ apnī to nazar aa.e jahāñ se duur

is nā-murād se jo tire āstāñ pe hai

achchhā hai bad-nasīb jo hai āstāñ se duur

ab tak koī batā na sakā rāh-e-ishq meñ

manzil kahāñ se paas hai 'bismil' kahāñ se duur

rahne ko hum qafas mein rahe aashiyan se dur

lekin chaman mein thi ye jagah aasman se dur

is qurb se jo sajdon mein tujh se hua mujhe

sajde bhi hain muqablatan aastan se dur

jitna main aashiyan mein qafas se qarib tha

utna hi ab qafas mein hun main aashiyan se dur

hasil na jis ki ruh ko ho qurb-e-mai-kada

wo na-murad rahmat-e-pir-e-mughan se dur

tujh se bhi dur tak koi aisi jagah nahin

mahfil mein apni to nazar aae jahan se dur

is na-murad se jo tere aastan pe hai

achchha hai bad-nasib jo hai aastan se dur

ab tak koi bata na saka rah-e-ishq mein

manzil kahan se pas hai 'bismil' kahan se dur