رہنے کو صرف جسم تھا زیر زمیں رہا

رہنے کو صرف جسم تھا زیر زمیں رہا

جو کچھ تھا میرے پاس یہاں کا یہیں رہا

لوگوں کا کیا ہے ان کا رویہ یہی تو ہے

ایسا نہیں رہا کبھی ویسا نہیں رہا

ہو مشکلوں کا دور کہ خوشیوں کا سلسلہ

ہر حال میں مجھے تو اسی پر یقیں رہا

دل میں ہی رہ گئی ہے طلب اس کے دید کی

پردہ نشیں تو آج بھی پردہ نشیں رہا

اس کو بڑا غرور تھا مستانہ چال پر

ٹھوکر لگی پھر ایسی کہیں کا نہیں رہا

آوارگی نے ساتھ نہیں چھوڑا عمر بھر

میں اور میرا ذہن کہیں دل کہیں رہا

جتنی کہانیاں تھیں فقط راستوں کی تھیں

منزل پہ آ کے لطف ہی باقی نہیں رہا

ملنے کی آس آخری دم تک بنی رہی

بے جان جسم تھا مرا زندہ یقیں رہا