rahraw se sarokar na manzil ki KHabar hai

rahrav se sarokār na manzil kī ḳhabar hai

dīvāna-e-ulfat hai ki sargarm-e-safar hai

vaañ chaah nahīñ miltī hai yaañ chain nahīñ hai

taskīn-e-dil-e-zār idhar hai na udhar hai

zarre haiñ ki garmā.e hue nuur ke taare

ik barq-e-tapāñ hai ki tirī rāhguzar hai

ek ek adā hosh-talab dushman-e-īmāñ

vo yūsuf-e-sānī ba-ḳhudā rashk-e-qamar hai

aa mere jahāñ meñ mirī duniyā kī tamannā

ab merī murādoñ kā jahāñ zer-o-zabar hai

gum-gashta-e-manzil huuñ mohabbat meñ kuchh aisā

bikhrā huā shīrāza-e-taskīn-e-nazar hai

'jauhar' ye ġham-e-rāh ye dushvārī-e-manzil

kahtā hai mirā dil ki qayāmat kā safar hai

rahraw se sarokar na manzil ki KHabar hai

diwana-e-ulfat hai ki sargarm-e-safar hai

wan chah nahin milti hai yan chain nahin hai

taskin-e-dil-e-zar idhar hai na udhar hai

zarre hain ki garmae hue nur ke tare

ek barq-e-tapan hai ki teri rahguzar hai

ek ek ada hosh-talab dushman-e-iman

wo yusuf-e-sani ba-KHuda rashk-e-qamar hai

aa mere jahan mein meri duniya ki tamanna

ab meri muradon ka jahan zer-o-zabar hai

gum-gashta-e-manzil hun mohabbat mein kuchh aisa

bikhra hua shiraaza-e-taskin-e-nazar hai

'jauhar' ye gham-e-rah ye dushwari-e-manzil

kahta hai mera dil ki qayamat ka safar hai