rahti hai yaad-e-yar dil-e-be-qarar mein

rahtī hai yād-e-yār dil-e-be-qarār meñ

Thahrā huā hai jaam kaf-e-rāsha-dār meñ

itnā ḳhulūs zāhid-e-shab-zinda-dār meñ

shāyad ki ye namāz hai hūroñ ke pyaar meñ

jiite raheñge gardish-e-lail-o-nahār meñ

piite raheñge mausam-e-nā-sāzgār meñ

zāhid ye mere ashk-e-nadāmat to dekhnā

hote haiñ jazb dāman-e-parvardigār meñ

hai zindagī to jiit bhī ho jā.egī kabhī

ai dil na ho malūl mohabbat kī haar meñ

vo jān-e-sad-bahār na jaane kab aa.egā

sadiyāñ guzar ga.ī haiñ fareb-e-bahār meñ

'rif.at' harīm-e-nāz ke parde ulaT ga.e

merī nigāh-e-shauq ke pahle hī vaar meñ

rahti hai yaad-e-yar dil-e-be-qarar mein

Thahra hua hai jam kaf-e-rasha-dar mein

itna KHulus zahid-e-shab-zinda-dar mein

shayad ki ye namaz hai huron ke pyar mein

jite rahenge gardish-e-lail-o-nahaar mein

pite rahenge mausam-e-na-sazgar mein

zahid ye mere ashk-e-nadamat to dekhna

hote hain jazb daman-e-parwardigar mein

hai zindagi to jit bhi ho jaegi kabhi

ai dil na ho malul mohabbat ki haar mein

wo jaan-e-sad-bahaar na jaane kab aaega

sadiyan guzar gai hain fareb-e-bahaar mein

'rifat' harim-e-naz ke parde ulaT gae

meri nigah-e-shauq ke pahle hi war mein