rahzani hai sar-e-bazar tumhein kya malum

rahzanī hai sar-e-bāzār tumheñ kyā ma.alūm

tum to ho qāfila-sālār tumheñ kyā ma.alūm

naam kis shai kā hai āzār tumheñ kyā ma.alūm

zindagī gul hai ki hai ḳhaar tumheñ kyā ma.alūm

mahv-e-ā.īna ho tum tum ko ḳhabar bhī kyoñ ho

kaun kis kā hai talabgār tumheñ kyā ma.alūm

mere hañsne pe na jaao ye mirī aadat hai

dil pe chaltī hai jo talvār tumheñ kyā ma.alūm

sar-e-bāzār lahū biktā hai fan biktā hai

haañ magar garmī-e-bāzār tumheñ kyā ma.alūm

tum ne āñkhoñ meñ koī raat kahāñ kaaTī hai

TūTte tāroñ kī jhankār tumheñ kyā ma.alūm

jin ko aa jaatā hai jiine kā salīqa 'azmat'

muskurāte haiñ sar-e-dār tumheñ kyā mālūm

rahzani hai sar-e-bazar tumhein kya malum

tum to ho qafila-salar tumhein kya malum

nam kis shai ka hai aazar tumhein kya malum

zindagi gul hai ki hai KHar tumhein kya malum

mahw-e-aina ho tum tum ko KHabar bhi kyon ho

kaun kis ka hai talabgar tumhein kya malum

mere hansne pe na jao ye meri aadat hai

dil pe chalti hai jo talwar tumhein kya malum

sar-e-bazar lahu bikta hai fan bikta hai

han magar garmi-e-bazar tumhein kya malum

tum ne aankhon mein koi raat kahan kaTi hai

TuTte taron ki jhankar tumhein kya malum

jin ko aa jata hai jine ka saliqa 'azmat'

muskuraate hain sar-e-dar tumhein kya malum