rais ashkon se daman ko bhigo lete to achchha tha

'ra.īs' ashkoñ se dāman ko bhigo lete to achchhā thā

huzūr-e-dost kuchh gustāḳh ho lete to achchhā thā

judā.ī meñ ye shart-e-zabt-e-ġham to maar Dālegī

ham un ke sāmne kuchh der ro lete to achchhā thā

bahāroñ se nahīñ jin ko tavaqqo.a lāla-o-gul kī

vo apne vāste kāñTe hī bo lete to achchhā thā

abhī to nisf shab hai intizār-e-sub.h-e-nau kaisā

dil-e-bedār ham kuchh der so lete to achchhā thā

qalam-rau dād-e-ḳhūn-o-ashk likhne se jhijaktā hai

qalam ko ashk-o-ḳhūñ hī meñ Dubo lete to achchhā thā

faqat ik girya-e-shabnam kifāyat kar nahīñ saktā

chaman vaale kabhī jī-bhar ke ro lete to achchhā thā

surāġh-e-kārvāñ tak kho gayā ab sochte ye haiñ

ki gard-e-kārvāñ ke saath ho lete to achchhā thā

'rais' ashkon se daman ko bhigo lete to achchha tha

huzur-e-dost kuchh gustaKH ho lete to achchha tha

judai mein ye shart-e-zabt-e-gham to mar Dalegi

hum un ke samne kuchh der ro lete to achchha tha

bahaaron se nahin jin ko tawaqqoa lala-o-gul ki

wo apne waste kanTe hi bo lete to achchha tha

abhi to nisf shab hai intizar-e-subh-e-nau kaisa

dil-e-bedar hum kuchh der so lete to achchha tha

qalam-rau dad-e-KHun-o-ashk likhne se jhijakta hai

qalam ko ashk-o-KHun hi mein Dubo lete to achchha tha

faqat ek girya-e-shabnam kifayat kar nahin sakta

chaman wale kabhi ji-bhar ke ro lete to achchha tha

suragh-e-karwan tak kho gaya ab sochte ye hain

ki gard-e-karwan ke sath ho lete to achchha tha