rakh li mathe pe shikan uski nishani jaise

rakh lī māthe pe shikan us kī nishānī jaise

na.e ghar meñ ho rakhī chiiz purānī jaise

aise bhūlī hai mirī aañkh hunar rone kā

kisī jharne se bichhaḌ jaa.e ravānī jaise

terī āñkhoñ se bhalā kaise haTā.ūñ āñkheñ

mujh pe khulte hī nahīñ in ke ma.ānī jaise

aa.ina kahne lagā kuchh kamī tujh meñ bhī hai

ham ne bhī pūchh dharā us se ki ya.anī jaise

vo kisī sher meñ Dhal jaa.e ġhanīmat varna

us ko tafsīl se likkhūñgā kahānī jaise

ham tire hijr meñ sahrā kī taraf kyoñ bhāgeñ

ham ne sīkhī hī nahīñ ḳhaak uḌānī jaise

maiñ ne har roz tujhe dil se nikālā to magar

kisī dariyā se nikāle koī paanī jaise

kyā burā hai ki jo bātin hai vahī zāhir hai

ham ko aatī hī nahīñ baat banānī jaise

rakh li mathe pe shikan us ki nishani jaise

nae ghar mein ho rakhi chiz purani jaise

aise bhuli hai meri aankh hunar rone ka

kisi jharne se bichhaD jae rawani jaise

teri aankhon se bhala kaise haTaun aankhen

mujh pe khulte hi nahin in ke maani jaise

aaina kahne laga kuchh kami tujh mein bhi hai

hum ne bhi puchh dhara us se ki yani jaise

wo kisi sher mein Dhal jae ghanimat warna

us ko tafsil se likkhunga kahani jaise

hum tere hijr mein sahra ki taraf kyon bhagen

hum ne sikhi hi nahin KHak uDani jaise

main ne har roz tujhe dil se nikala to magar

kisi dariya se nikale koi pani jaise

kya bura hai ki jo baatin hai wahi zahir hai

hum ko aati hi nahin baat banani jaise