رکھا ہے دل ان بتوں سے ہم نے چھپا چھپا کر چھپا چھپا کر

رکھا ہے دل ان بتوں سے ہم نے چھپا چھپا کر چھپا چھپا کر

بلا یہ ٹالی ہے سر سے اپنے خدا خدا کر خدا خدا کر

ستم تو دیکھو یہ کیا ستم ہے بلا کے غیروں کو پاس اپنے

وہ کس ڈھٹائی سے ہیں بٹھائے دکھا دکھا کر دکھا دکھا کر

زباں پہ لانے سے فائدہ کیا مجھے خبر ہے عدو نے ان کو

مری طرف سے کیا ہے بد ظن لگا لگا کر لگا لگا کر

سنی حقیقت نا کان دھر کے کبھی نہ پوچھا کہ حال کیا ہے

فسانۂ غم ہم ان کو ہارے سنا سنا کر سنا سنا کر

بھلا نا غصے سے ہم چبائیں بتاؤ کیوں کر نہ ہونٹ اپنا

رقیب کرتے ہیں ہم سے باتیں چبا چبا کر چبا چبا کر

جتائے دیتے ہیں اتنا ہم یہ تم ان کے دم میں کہیں نہ آنا

وہ جان و دل لیں ہیں چھین باتیں بنا بنا کر بنا بنا کر

جو ہاتھ بندوں کا عیشؔ اس نے کرم سے خالی نہیں ہے رکھا

دعائیں مانگیں ہیں اس سے وہ ہاتھ اٹھا اٹھا کر اٹھا اٹھا کر