rakha pa jahan mein nagara zamin par

rakhā pā jahāñ meñ nagārā zamīñ par

bahut sar ko vaañ ham ne maarā zamīñ par

junūñ josh maare hai dīvār-o-dar se

huā kis parī kā guzārā zamīñ par

nahīñ hai ye āh-e-falak sā ki ham ne

alam shor-e-saudā kā gāḌhā zamīñ par

qadam jis jagah rakkhā us sañg-dil ne

na ho vaañ ba-juz sañg-e-ḳhārā zamīñ par

nazar se tirī jis ne ham ko girāyā

falak se uThā kar ke maarā zamīñ par

tū rū-e-zamīñ dekh le sair ho kar

na hogā guzar phir dobārā zamīñ par

tire naqsh-e-pā ko kahe apnā ham-sar

nahīñ hai ye muñh to hamārā zamīñ par

vo zohra-jabīñ mehrbāñ hove 'hasrat'

kahāñ hai ye apnā sitārā zamīñ par

rakha pa jahan mein nagara zamin par

bahut sar ko wan hum ne mara zamin par

junun josh mare hai diwar-o-dar se

hua kis pari ka guzara zamin par

nahin hai ye aah-e-falak sa ki hum ne

alam shor-e-sauda ka gaDha zamin par

qadam jis jagah rakkha us sang-dil ne

na ho wan ba-juz sang-e-KHara zamin par

nazar se teri jis ne hum ko giraya

falak se uTha kar ke mara zamin par

tu ru-e-zamin dekh le sair ho kar

na hoga guzar phir dobara zamin par

tere naqsh-e-pa ko kahe apna ham-sar

nahin hai ye munh to hamara zamin par

wo zohra-jabin mehrban howe 'hasrat'

kahan hai ye apna sitara zamin par