rakhiye zaban-e-Khaar hamari zaban ke sath

rakhiye zabān-e-ḳhār hamārī zabāñ ke saath

is kā bayāñ milegā hamāre bayāñ ke saath

kyā jāneñ kyoñ hamārī yaqīñ se na nibh sakī

ham aaj tak nibāh rahe haiñ gumāñ ke saath

ek ek bhed khol ke chhoḌeñge us kā ham

ab zid sī ho ga.ī hai hameñ āsmāñ ke saath

lagtā hai jaise baat koī besh-o-kam kī hai

phir aaj shaiḳh uljhe haiñ pīr-e-muġhāñ ke saath

sīkheñge kis se paar utarne kā aap fan

ham ne to bāñdh rakkhe haiñ patthar zabāñ ke saath

vo to sulūk kartā rahā hai burā-bhalā

ham bhī bigāḌ baiThe haiñ yaaro jahāñ ke saath

be-lutf aisī ho ga.ī 'rāhat' ye zindagī

jaise bigaḌ ga.ī ho kisī meherbāñ ke saath

rakhiye zaban-e-KHar hamari zaban ke sath

is ka bayan milega hamare bayan ke sath

kya jaanen kyon hamari yaqin se na nibh saki

hum aaj tak nibah rahe hain guman ke sath

ek ek bhed khol ke chhoDenge us ka hum

ab zid si ho gai hai hamein aasman ke sath

lagta hai jaise baat koi besh-o-kam ki hai

phir aaj shaiKH uljhe hain pir-e-mughan ke sath

sikhenge kis se par utarne ka aap fan

hum ne to bandh rakkhe hain patthar zaban ke sath

wo to suluk karta raha hai bura-bhala

hum bhi bigaD baiThe hain yaro jahan ke sath

be-lutf aisi ho gai 'rahat' ye zindagi

jaise bigaD gai ho kisi meherban ke sath