rakhna hai to phulon ko tu rakh le nigahon mein

rakhnā hai to phūloñ ko tū rakh le nigāhoñ meñ

ḳhushbū to musāfir hai kho jā.egī rāhoñ meñ

kyuuñ merī mohabbat se barham ho zamīñ vaalo

ik aur gunah rakh lo duniyā ke gunāhoñ meñ

kaifiyat-e-mai dil kā darmāñ na huī lekin

rañgīñ to rahī duniyā kuchh der nigāhoñ meñ

kāñToñ se guzar jaanā dushvār nahīñ lekin

kāñTe hī nahīñ yaaro kaliyāñ bhī haiñ rāhoñ meñ

parda ho to parda ho is parde ko kyā kahiye

chhupte haiñ nigāhoñ se rahte haiñ nigāhoñ meñ

yārān-e-rah-e-ġhurbat kyā ho ga.e kyā kahiye

kuchh so ga.e manzil par kuchh kho ga.e rāhoñ meñ

guzrī huī sadiyoñ ko āġhāz-e-safar samjho

maazī abhī kam-sin hai fardā kī nigāhoñ meñ

rañgīñ hai 'shamīm' ab tak pairāhan-e-jāñ apnā

ham raat guzār aa.e kis ḳhvāb kī bāñhoñ meñ

rakhna hai to phulon ko tu rakh le nigahon mein

KHushbu to musafir hai kho jaegi rahon mein

kyun meri mohabbat se barham ho zamin walo

ek aur gunah rakh lo duniya ke gunahon mein

kaifiyat-e-mai dil ka darman na hui lekin

rangin to rahi duniya kuchh der nigahon mein

kanTon se guzar jaana dushwar nahin lekin

kanTe hi nahin yaro kaliyan bhi hain rahon mein

parda ho to parda ho is parde ko kya kahiye

chhupte hain nigahon se rahte hain nigahon mein

yaran-e-rah-e-ghurbat kya ho gae kya kahiye

kuchh so gae manzil par kuchh kho gae rahon mein

guzri hui sadiyon ko aaghaz-e-safar samjho

mazi abhi kam-sin hai farda ki nigahon mein

rangin hai 'shamim' ab tak pairahan-e-jaan apna

hum raat guzar aae kis KHwab ki banhon mein