رکھنا ہو تو دل کو نگہ یار میں رکھنا

رکھنا ہو تو دل کو نگہ یار میں رکھنا

اس جنس گرامی کو نہ بازار میں رکھنا

ہم اہل تمنا کی بس اتنی ہے کرامت

اک خواب سدا دیدۂ بے دار میں رکھنا

انجام طرب بھی تو تأسف ہے سو اس بار

خوشیوں کو بھی تخمینہ آزار میں رکھنا

اب گھر جو بنانا کوئی خوابوں کی زمیں پر

امکان تغیر در و دیوار میں رکھنا

ناحق کسی مظلوم پر اٹھے تو لچک جائے

یہ جوہر نایاب بھی تلوار میں رکھنا

یہ کیا کہ ہر اک دل میں جگانا طلب حسن

اور خود کو نہاں پردۂ اسرار میں رکھنا