کہانیاں نہ ختم ہوں گی اختتامیوں کے ساتھ

کہانیاں نہ ختم ہوں گی اختتامیوں کے ساتھ

مجھے قبول کر مری تمام خامیوں کے ساتھ

تو اپنے حسن و ناز کے غرور میں ہی جل بجھی

وہ لوٹ لے گیا ہے بزم اپنی خوش کلامیوں کے ساتھ

کسی مقام جبر پر شہید ہو گئی ہوں میں

مجھے بھی دفن کیجئے گا سو سلامیوں کے ساتھ

یہ کیا ہوا کہ اس کے باوجود بازی ہار دی

کھڑی تھی میں تو سر اٹھائے اپنے حامیوں کے ساتھ

جہاں جہاں گئی ہوں میں تمہارا ہاتھ تھام کر

ہوا ادھر ادھر گئی سبک خرامیوں کے ساتھ

مری زمیں ترے تئیں یہ فیصلہ درست ہے

ہوا جو حال وہ ہوا بد انتظامیوں کے ساتھ

عبور کرنا سہل کب ہے پل صراط عشق کا

کنار زیست ہم کھڑے ہیں نا تمامیوں کے ساتھ