rakhta hai sada honT ko jun gul ki kali chup

rakhtā hai sadā hoñT ko juuñ gul kī kalī chup

vo ġhuncha-dahan aah ye sīkhā hai bhalī chup

sotā hai to letā huuñ maiñ yuuñ chorī se bosa

juuñ muñh meñ khilā de koī misrī kī Dalī chup

minnat se kahā ham ne to tum aah na bole

jab ġhair ne kī gudgudī phir kuchh na chalī chup

parvāne se āshiq ke ta.iiñ sham.a jalā kar

phir aap bhī rotī hai khaḌī baḳht-jalī chup

sabzī bhī ugī baaġh meñ ġhunche bhī khile aah

par is marī gūñgī ke laboñ se na Talī chup

ġhusse meñ raqīb aatā hai jab bhuut sā ban kar

paḌhtā huuñ maiñ jab dil meñ khaḌā na.at-e-alī chup

mar jaa.eñ pa shikve kī kabhī baat na nikle

ye hoñT vo haiñ jin meñ azal se hai palī chup

jis dam ye ḳhabar jā ke raqīboñ ko huī phir

bas sunte hī sun ho ga.e aur saañs na lī chup

ulTī hī samajh yaar kī suntā hai 'nazīr' aah

zinhār na kuchh boliyo yaañ sab se bhalī chup

rakhta hai sada honT ko jun gul ki kali chup

wo ghuncha-dahan aah ye sikha hai bhali chup

sota hai to leta hun main yun chori se bosa

jun munh mein khila de koi misri ki Dali chup

minnat se kaha hum ne to tum aah na bole

jab ghair ne ki gudgudi phir kuchh na chali chup

parwane se aashiq ke tain shama jala kar

phir aap bhi roti hai khaDi baKHt-jali chup

sabzi bhi ugi bagh mein ghunche bhi khile aah

par is mari gungi ke labon se na Tali chup

ghusse mein raqib aata hai jab bhut sa ban kar

paDhta hun main jab dil mein khaDa nat-e-ali chup

mar jaen pa shikwe ki kabhi baat na nikle

ye honT wo hain jin mein azal se hai pali chup

jis dam ye KHabar ja ke raqibon ko hui phir

bas sunte hi sun ho gae aur sans na li chup

ulTi hi samajh yar ki sunta hai 'nazir' aah

zinhaar na kuchh boliyo yan sab se bhali chup