rakkha to hai sanbhaal ke paya hua sa kuchh

rakkhā to hai sañbhāl ke paayā huā sā kuchh

lekin abhī bhī dil meñ hai khoyā huā sā kuchh

ye kis dayār-e-ġhair meñ hai kārvāñ mirā

mahsūs kar rahā huuñ maiñ bhaTkā huā sā kuchh

baiThā to huuñ sameT ke maiñ apne aap ko

par terī rah-guzar pe huuñ bikhrā huā sā kuchh

kab tak sañbhāl pāoge rishtoñ kī Dor ko

suljhā huā sā kuchh hai to uljhā huā sā kuchh

ḳhāmoshiyoñ kī 'ādat-e-bejā hai is-qadar

pattā bhī khaḌkhaḌā.e to dhaḌkā huā sā kuchh

ham ne tumhāre naam pe tahrīr kar to dī

sochā huā sā kuchh hai to likkhā huā sā kuchh

āñkhoñ meñ ashk aa.e the ham ne chhupā liye

hañstā huā sā kuchh hai to rotā huā sā kuchh

zulfoñ ke is hisār se bāhar nikal 'samīr'

zulfoñ ke is hisār meñ phañstā huā sā kuchh

rakkha to hai sanbhaal ke paya hua sa kuchh

lekin abhi bhi dil mein hai khoya hua sa kuchh

ye kis dayar-e-ghair mein hai karwan mera

mahsus kar raha hun main bhaTka hua sa kuchh

baiTha to hun sameT ke main apne aap ko

par teri rah-guzar pe hun bikhra hua sa kuchh

kab tak sanbhaal paoge rishton ki Dor ko

suljha hua sa kuchh hai to uljha hua sa kuchh

KHamoshiyon ki 'adat-e-beja hai is-qadar

patta bhi khaDkhaDae to dhaDka hua sa kuchh

hum ne tumhaare nam pe tahrir kar to di

socha hua sa kuchh hai to likkha hua sa kuchh

aankhon mein ashk aae the hum ne chhupa liye

hansta hua sa kuchh hai to rota hua sa kuchh

zulfon ke is hisar se bahar nikal 'samir'

zulfon ke is hisar mein phansta hua sa kuchh