rakkhe hain aap hath jahan ab wahan nahin

rakkhe haiñ aap haath jahāñ ab vahāñ nahīñ

ham kyā batā.eñ dard kahāñ hai kahāñ nahīñ

dil le ga.e vo dard-e-mohabbat kahāñ rahe

ibrat kā hai mahal ki makīñ hai makāñ nahīñ

ai barq kis ke vāste betāb aaj hai

is baaġh meñ mirā to kahīñ āshiyāñ nahīñ

qātil samajh ke aaj zarā teġh-e-nāz khīñch

ye imtihāñ tirā hai mirā imtihāñ nahīñ

chhūTeñge umr bhar tirī zulfoñ ke kyā asiir

kaaTe kaTeñ kisī ke ye vo beḌiyāñ nahīñ

lo ik jahāñ unhīñ kā taraf-dār ho gayā

mahshar meñ aaj koī mirā ham-zabāñ nahīñ

duniyā meñ hashr uThe bhī to kyā dekh kar uThe

mere mazār kā to kahīñ bhī nishāñ nahīñ

tum kyā badal ga.e ki zamāna badal gayā

ab vo zamīñ nahīñ hai vo ab āsmāñ nahīñ

maskan zamīn-e-sher meñ 'safdar' banā liyā

rahte haiñ us zamīñ pe jahāñ āsmāñ nahīñ

rakkhe hain aap hath jahan ab wahan nahin

hum kya bataen dard kahan hai kahan nahin

dil le gae wo dard-e-mohabbat kahan rahe

ibrat ka hai mahal ki makin hai makan nahin

ai barq kis ke waste betab aaj hai

is bagh mein mera to kahin aashiyan nahin

qatil samajh ke aaj zara tegh-e-naz khinch

ye imtihan tera hai mera imtihan nahin

chhuTenge umr bhar teri zulfon ke kya asir

kaTe kaTen kisi ke ye wo beDiyan nahin

lo ek jahan unhin ka taraf-dar ho gaya

mahshar mein aaj koi mera ham-zaban nahin

duniya mein hashr uThe bhi to kya dekh kar uThe

mere mazar ka to kahin bhi nishan nahin

tum kya badal gae ki zamana badal gaya

ab wo zamin nahin hai wo ab aasman nahin

maskan zamin-e-sher mein 'safdar' bana liya

rahte hain us zamin pe jahan aasman nahin