rakkhe har ek qadam pe jo mushkil ki aagahi

rakkhe har ik qadam pe jo mushkil kī āgahī

miltī hai us ko raah se manzil kī āgahī

sīkhā hai aadmī ne ka.ī tajraboñ ke ba.ad

tūfān se hī miltī hai sāhil kī āgahī

us kā ḳhudā se rābta hī kuchh ajiib hai

duniyā kahāñ samajhtī hai saa.il kī āgahī

nazroñ kā e.atibār to hai phir bhī merā dil

hai ik sahīfa jis meñ masā.il kī āgahī

din-rāt jis ke pyaar meñ rahtī huuñ be-qarār

us ko nahīñ hai kyuuñ dil-e-bismil kī āgahī

yādoñ ke ik hujūm meñ rah kar patā chalā

tanhā.ī bhī to rakhtī hai mahfil kī āgahī

ḳhanjar kā e.atibār nahīñ vo to saaf hai

lekin milegī ḳhuun se qātil kī āgahī

mashq-e-suḳhan 'sabīla' nikhāregī fan ko aur

matlūb hai kuchh aur abhī dil kī āgahī

rakkhe har ek qadam pe jo mushkil ki aagahi

milti hai us ko rah se manzil ki aagahi

sikha hai aadmi ne kai tajrabon ke baad

tufan se hi milti hai sahil ki aagahi

us ka KHuda se rabta hi kuchh ajib hai

duniya kahan samajhti hai sail ki aagahi

nazron ka eatibar to hai phir bhi mera dil

hai ek sahifa jis mein masail ki aagahi

din-raat jis ke pyar mein rahti hun be-qarar

us ko nahin hai kyun dil-e-bismil ki aagahi

yaadon ke ek hujum mein rah kar pata chala

tanhai bhi to rakhti hai mahfil ki aagahi

KHanjar ka eatibar nahin wo to saf hai

lekin milegi KHun se qatil ki aagahi

mashq-e-suKHan 'sabila' nikhaaregi fan ko aur

matlub hai kuchh aur abhi dil ki aagahi