ramz-gar bhi gaya ramz-dan bhi gaya

ramz-gar bhī gayā ramz-dāñ bhī gayā

husn ke saath husn-e-bayāñ bhī gayā

sar se tāroñ bharī sar-zamīñ bhī ga.ī

paañv se ḳhaak kā āsmāñ bhī gayā

phuul hī phuul the kunj-e-āzār meñ

tum vahāñ bhī na the maiñ vahāñ bhī gayā

pahle miTTī uḌī manziloñ kī taraf

phir use DhūñDne kārvāñ bhī gayā

maiñ akelā na thā kū-rusvā.ī meñ

saath vīrāna-e-jism-o-jāñ bhī gayā

rañg pastī ke phir bhī na ifshā hue

yuuñ to pātāl tak āsmāñ bhī gayā

ishq meñ bām-o-dar bhī na pīchhe rahe

saath apne makīñ ke makāñ bhī gayā

'tābish' apne basere kī jānib chalo

is se kyā tum ko sūraj jahāñ bhī gayā

ramz-gar bhi gaya ramz-dan bhi gaya

husn ke sath husn-e-bayan bhi gaya

sar se taron bhari sar-zamin bhi gai

panw se KHak ka aasman bhi gaya

phul hi phul the kunj-e-azar mein

tum wahan bhi na the main wahan bhi gaya

pahle miTTi uDi manzilon ki taraf

phir use DhunDne karwan bhi gaya

main akela na tha ku-ruswai mein

sath virana-e-jism-o-jaan bhi gaya

rang pasti ke phir bhi na ifsha hue

yun to patal tak aasman bhi gaya

ishq mein baam-o-dar bhi na pichhe rahe

sath apne makin ke makan bhi gaya

'tabish' apne basere ki jaanib chalo

is se kya tum ko suraj jahan bhi gaya