rang-amezi se paida kuchh asar aisa hua

rañg-āmezī se paidā kuchh asar aisā huā

ḳhud musavvir apnī hī tasvīr kā shaidā huā

kyā nigāhoñ kī tashaffī ho ki bazm-e-dahr meñ

sāmne aatā hai har manzar mirā dekhā huā

khol kar āñkheñ zarā ye husn-e-mahr-o-māh dekh

diid ke qābil hai zarra charḳh par pahuñchā huā

ishq ne is dil ko dam lene kī fursat hī na dī

ek jab armān niklā dūsrā paidā huā

barq ke sho.aloñ munāsib hai mujhī ko phūñk do

kis kaleje se maiñ dekhūñ āshiyāñ jaltā huā

ik vahī apnā ḳhudā hai ik vahī hai apnā but

jis ke dar par sar jhukā dene se sar ūñchā huā

pahuñcho gar ik chāñd par sau aur aate haiñ nazar

āsmāñ jaane hai kitnī duur tak phailā huā

ab 'falak' hai ik na.ī duniyā kī dil kī justujū

ye zamīñ dekhī huī hai āsmāñ dekhā huā

rang-amezi se paida kuchh asar aisa hua

KHud musawwir apni hi taswir ka shaida hua

kya nigahon ki tashaffi ho ki bazm-e-dahr mein

samne aata hai har manzar mera dekha hua

khol kar aankhen zara ye husn-e-mahr-o-mah dekh

did ke qabil hai zarra charKH par pahuncha hua

ishq ne is dil ko dam lene ki fursat hi na di

ek jab arman nikla dusra paida hua

barq ke shoalon munasib hai mujhi ko phunk do

kis kaleje se main dekhun aashiyan jalta hua

ek wahi apna KHuda hai ek wahi hai apna but

jis ke dar par sar jhuka dene se sar uncha hua

pahuncho gar ek chand par sau aur aate hain nazar

aasman jaane hai kitni dur tak phaila hua

ab 'falak' hai ek nai duniya ki dil ki justuju

ye zamin dekhi hui hai aasman dekha hua