rang ab yun teri taswir mein bharta jaun

rang ab yuuñ tirī tasvīr meñ bhartā jā.ūñ

tujh pe rang aa.e maiñ jaañ se bhī guzartā jā.ūñ

vo diyā huuñ ki havāoñ se bhī Dartā jā.ūñ

fart-e-pindār se phir raqs bhī kartā jā.ūñ

'ajab āshob diyā mere ḳhudā ne mujh ko

ik tamannā-e-masīhā.ī meñ martā jā.ūñ

mujh ko jhuTlātī rahīñ vo mirī munkir āñkheñ

aur maiñ sūrat-e-ḳhurshīd ubhartā jā.ūñ

mere chehre pe na jaao ki mirā husn hai ye

apne likkhe hue lafzoñ meñ nikhartā jā.ūñ

aisī tanhā.ī kā 'ālam hai ki har shaḳhs ke paas

ik pazīrā.ī kī hasrat meñ Thahartā jā.ūñ

'shauq' shā'ir bhī huuñ andesha-e-jāñ bhī hai mujhe

ruuh meñ shor karūñ lafz meñ Dartā jā.ūñ

rang ab yun teri taswir mein bharta jaun

tujh pe rang aae main jaan se bhi guzarta jaun

wo diya hun ki hawaon se bhi Darta jaun

fart-e-pindar se phir raqs bhi karta jaun

'ajab aashob diya mere KHuda ne mujh ko

ek tamanna-e-masihai mein marta jaun

mujh ko jhuTlati rahin wo meri munkir aankhen

aur main surat-e-KHurshid ubharta jaun

mere chehre pe na jao ki mera husn hai ye

apne likkhe hue lafzon mein nikharta jaun

aisi tanhai ka 'alam hai ki har shaKHs ke pas

ek pazirai ki hasrat mein Thaharta jaun

'shauq' sha'ir bhi hun andesha-e-jaan bhi hai mujhe

ruh mein shor karun lafz mein Darta jaun