rang ashkon ka badalne bhi nahin deta wo

rañg ashkoñ kā badalne bhī nahīñ detā vo

aur mujhe ghar se nikalne bhī nahīñ detā vo

Dastā rahtā hai bahut merī anā ko pal-pal

apnī qurbat se nikalne bhī nahīñ detā vo

zabt chehre kī tamāzat se ayaañ hai lekin

merī āñkhoñ ko ubalne bhī nahīñ detā vo

kāġhaz-e-dil ko bhigotā hai na.e ashkoñ se

phir ye kāġhaz kabhī jalne bhī nahīñ detā vo

bas Darātā hai ki us raah pe phislan hai bahut

ishq kī raah pe chalne bhī nahīñ detā vo

chāhtā hai ki maiñ gir jā.ūñ nazar se us kī

is liye mujh ko sambhalne bhī nahīñ detā vo

mere kirdār meñ Dhaltā bhī nahīñ ḳhud 'rāhī'

apne kirdār meñ Dhalne bhī nahīñ detā vo

rang ashkon ka badalne bhi nahin deta wo

aur mujhe ghar se nikalne bhi nahin deta wo

Dasta rahta hai bahut meri ana ko pal-pal

apni qurbat se nikalne bhi nahin deta wo

zabt chehre ki tamazat se ayan hai lekin

meri aankhon ko ubalne bhi nahin deta wo

kaghaz-e-dil ko bhigota hai nae ashkon se

phir ye kaghaz kabhi jalne bhi nahin deta wo

bas Daraata hai ki us rah pe phislan hai bahut

ishq ki rah pe chalne bhi nahin deta wo

chahta hai ki main gir jaun nazar se us ki

is liye mujh ko sambhalne bhi nahin deta wo

mere kirdar mein Dhalta bhi nahin KHud 'rahi'

apne kirdar mein Dhalne bhi nahin deta wo