rang aur rup mein sone se khari hoti hai

rañg aur ruup meñ sone se kharī hotī hai

dil kī vo rag jo mohabbat se bharī hotī hai

āshiyāne ko panapne nahīñ detī duniyā

barq gir paḌtī hai jab shāḳh harī hotī hai

jheñp jaatā hai chaTaktī huī kaliyoñ kā shabāb

mast āñkhoñ meñ agar niiñd bharī hotī hai

ashk barsātī huī aatī hai gulshan meñ bahār

phuul khilte haiñ to shabnam kī tarī hotī hai

arsh-o-kursī-o-falak dair-o-haram ka.aba-e-dil

phir bhī mahdūd tirī jalvagarī hotī hai

kahkashāñ dekhtī hai us kī tajallī kā nikhār

jis kī añgḌā.ī meñ jādū-asarī hotī hai

din ko gar dhuup kī chādar meñ sukūñ miltā hai

raat ab ḳhatm charāġh-e-saharī hotī hai

yaad aa jaatī hai ḳhud apnī nikhartī tauba

jaam meñ jab mai-e-ḳhush-rañg bharī hotī hai

chāhe lafzoñ meñ kahe chāhe ishāroñ se kahe

'fazl' jo baat bhī kahtā hai kharī hotī hai

rang aur rup mein sone se khari hoti hai

dil ki wo rag jo mohabbat se bhari hoti hai

aashiyane ko panapne nahin deti duniya

barq gir paDti hai jab shaKH hari hoti hai

jhenp jata hai chaTakti hui kaliyon ka shabab

mast aankhon mein agar nind bhari hoti hai

ashk barsati hui aati hai gulshan mein bahaar

phul khilte hain to shabnam ki tari hoti hai

arsh-o-kursi-o-falak dair-o-haram kaba-e-dil

phir bhi mahdud teri jalwagari hoti hai

kahkashan dekhti hai us ki tajalli ka nikhaar

jis ki angDai mein jadu-asari hoti hai

din ko gar dhup ki chadar mein sukun milta hai

raat ab KHatm charagh-e-sahari hoti hai

yaad aa jati hai KHud apni nikharti tauba

jam mein jab mai-e-KHush-rang bhari hoti hai

chahe lafzon mein kahe chahe ishaaron se kahe

'fazl' jo baat bhi kahta hai khari hoti hai