rang badla hai kai din se mizaj-e-yar ka

rañg badlā hai ka.ī din se mizāj-e-yār kā

joḌ shāyad chal gayā phir aaj kal aġhyār kā

kas qadar paayā savedā-e-dil-e-āshiq ne auj

rafta rafta til banā āḳhir tire ruḳhsār kā

ab to aa kar dekh jaanā chāhiye tujh ko zarūr

haal hai nau-e-digar iisā tire bīmār kā

be-ḳhudī meñ zaḳhm-e-dil par jabki paḌtī hai nazar

hotā hai dhokā tumhāre rauzan-e-dīvār kā

hāl-e-dard-e-dil bayāñ kis se karūñ maiñ bad-nasīb

tū hī jab pursāñ na ho le mere hāl-e-zār kā

baat karnā ho gayā mushkil butoñ ke sāmne

paḌ gayā phandā gale meñ rishta-e-zunnār kā

ho gayā huuñ nā-tavāñ aisā tumhāre hijr meñ

toḌnā mushkil huā hai āñsuoñ ke taar kā

ik faqat tere kashīda hone se ye haal hai

bhāgtā hai saaya tak mujh se tirī dīvār kā

nā-tavāñ aisā huuñ pis kar ḳhaak ho jā.ūñ abhī

saaya paḌ jaa.e agar mujh par tirī dīvār kā

ab to sūrat apnī dikhlāo ḳhudā ke vāste

dam nikaltā hai tumhāre tālib-e-dīdār kā

apnī kam-fahmī se 'anjum' ham nihāyat tañg haiñ

zehn meñ aatā nahīñ mazmūñ dahān-e-yār kā

rang badla hai kai din se mizaj-e-yar ka

joD shayad chal gaya phir aaj kal aghyar ka

kas qadar paya saweda-e-dil-e-ashiq ne auj

rafta rafta til bana aaKHir tere ruKHsar ka

ab to aa kar dekh jaana chahiye tujh ko zarur

haal hai nau-e-digar isa tere bimar ka

be-KHudi mein zaKHm-e-dil par jabki paDti hai nazar

hota hai dhoka tumhaare rauzan-e-diwar ka

haal-e-dard-e-dil bayan kis se karun main bad-nasib

tu hi jab pursan na ho le mere haal-e-zar ka

baat karna ho gaya mushkil buton ke samne

paD gaya phanda gale mein rishta-e-zunnar ka

ho gaya hun na-tawan aisa tumhaare hijr mein

toDna mushkil hua hai aansuon ke tar ka

ek faqat tere kashida hone se ye haal hai

bhagta hai saya tak mujh se teri diwar ka

na-tawan aisa hun pis kar KHak ho jaun abhi

saya paD jae agar mujh par teri diwar ka

ab to surat apni dikhlao KHuda ke waste

dam nikalta hai tumhaare talib-e-didar ka

apni kam-fahmi se 'anjum' hum nihayat tang hain

zehn mein aata nahin mazmun dahan-e-yar ka