rang-birangi yaadon ka gul-dan bacha hai le de kar

rang-birangī yādoñ kā gul-dān bachā hai le de kar

mere jiine kā bas ik sāmān bachā hai le de kar

khāne piine kī sab chīzeñ mahñgā.ī kī nazr huiiñ

mehmānoñ ke aage dastarḳhvān bachā hai le de kar

raddī kāġhaz kī qīmat meñ bachche us ko bech na deñ

ghar meñ jo 'ġhālib' kā ik dīvān bachā hai le de kar

baap kī saarī jāgīreñ to baañT liiñ mil kar beToñ ne

maañ ke hisse meñ ghar kā dālān bachā hai le de kar

daulat aurat aur shohrat kī dīvānī is duniyā meñ

mushkil se kuchh logoñ kā īmān bachā hai le de kar

kyā jaane barsāt kaTegī kaise mere bachchoñ kī

ghar kī Dherī meñ thoḌā sā dhaan bachā hai le de kar

chal kar ab 'dīdār' vahīñ par ghar apnā ābād karo

gaañv meñ jo purkhoñ kā ik khaliyān bachā le de kar

rang-birangi yaadon ka gul-dan bacha hai le de kar

mere jine ka bas ek saman bacha hai le de kar

khane pine ki sab chizen mahngai ki nazr huin

mehmanon ke aage dastarKHwan bacha hai le de kar

raddi kaghaz ki qimat mein bachche us ko bech na den

ghar mein jo 'ghaalib' ka ek diwan bacha hai le de kar

bap ki sari jagiren to banT lin mil kar beTon ne

man ke hisse mein ghar ka dalan bacha hai le de kar

daulat aurat aur shohrat ki diwani is duniya mein

mushkil se kuchh logon ka iman bacha hai le de kar

kya jaane barsat kaTegi kaise mere bachchon ki

ghar ki Dheri mein thoDa sa dhan bacha hai le de kar

chal kar ab 'didar' wahin par ghar apna aabaad karo

ganw mein jo purkhon ka ek khaliyan bacha le de kar