rang-e-ehsas chhalakta hai nikhar jati hai

rang-e-ehsās chhalaktā hai nikhar jaatī hai

zindagī ishq ke saa.e meñ sañvar jaatī hai

ruuh chhūkar koī guzre to mohabbat kahnā

jism ko chhū ke havā bhī to guzar jaatī hai

jab junūñ khīñchne lagtā hai falak kī chādar

ḳhalq ik naqsh-e-kaf-e-pā meñ utar jaatī hai

dasht-o-sahrā meñ bhaTaktī huuñ maiñ tanhā lekin

mujh se lipTī huī ye kis kī nazar jaatī hai

sab ne dekhā hai bahut jism kā miTTī honā

ruuh ko dekhe koī ruuh kidhar jaatī hai

ek hī āb-o-havā hotī hai gulshan meñ magar

koī khiltī hai kalī koī bikhar jaatī hai

rang bharne ko utarte haiñ farishte saare

un kī tasvīr jo āñkhoñ meñ ubhar jaatī hai

un ke chhūne se mire zaḳhm chamak uThte haiñ

bekalī dil kī mirī jaane kidhar jaatī hai

koī manzar use raas aaya nahīñ duniyā meñ

DhūñDhtī hai ye nazar un ko jidhar jaatī hai

vo jo ik choT sī lag jaatī hai dil par apne

vo bhī duniyā kā hameñ de ke hunar jaatī hai

mushkileñ hī to mirā azm-e-safar haiñ 'rinkī'

ho jo āsānī to raftār Thahar jaatī hai

rang-e-ehsas chhalakta hai nikhar jati hai

zindagi ishq ke sae mein sanwar jati hai

ruh chhukar koi guzre to mohabbat kahna

jism ko chhu ke hawa bhi to guzar jati hai

jab junun khinchne lagta hai falak ki chadar

KHalq ek naqsh-e-kaf-e-pa mein utar jati hai

dasht-o-sahra mein bhaTakti hun main tanha lekin

mujh se lipTi hui ye kis ki nazar jati hai

sab ne dekha hai bahut jism ka miTTi hona

ruh ko dekhe koi ruh kidhar jati hai

ek hi aab-o-hawa hoti hai gulshan mein magar

koi khilti hai kali koi bikhar jati hai

rang bharne ko utarte hain farishte sare

un ki taswir jo aankhon mein ubhar jati hai

un ke chhune se mere zaKHm chamak uThte hain

bekali dil ki meri jaane kidhar jati hai

koi manzar use ras aaya nahin duniya mein

DhunDhti hai ye nazar un ko jidhar jati hai

wo jo ek choT si lag jati hai dil par apne

wo bhi duniya ka hamein de ke hunar jati hai

mushkilen hi to mera azm-e-safar hain 'rinki'

ho jo aasani to raftar Thahar jati hai