رنگ‌ گل شگفتہ ہوں آب رخ چمن ہوں میں

رنگ‌ گل شگفتہ ہوں آب رخ چمن ہوں میں

شمع حرم چراغ دیر قشقہ برہمن ہوں میں

کثرت جور یار سے سب ہیں یہ میرے جزو تن

سوز و ملال و یاس و درد رنج و غم و محن ہوں میں

میں ہوں نسیم تو بہار میں ہوں شمیم زلف یار

گو کہ نظر سے ہوں نہاں داخل انجمن ہوں میں

سرو نشیں اور ہیں شاخ نشیں گل اور ہیں

قمریٔ آشیاں خراب بلبل بے وطن ہوں میں

خندہ زناں ہیں تجھ پہ گو یہ خردان روزگار

اہل خرد میں اے ہوسؔ رونق انجمن ہوں میں