rang-e-gul-e-shagufta hun aab-e-ruKH-e-chaman hun main

rañg-e-gul-e-shagufta huuñ āb-e-ruḳh-e-chaman huuñ maiñ

sham-e-haram charāġh-e-dair qashqa-e-barahman huuñ maiñ

kasrat-e-jaur-e-yār se sab haiñ ye mere juzv-e-tan

soz-o-malāl-o-yās-o-dard ranj-o-ġham-o-mehan huuñ maiñ

maiñ huuñ nasīm to bahār maiñ huuñ shamīm zulf-e-yār

go ki nazar se huuñ nihāñ dāḳhil-e-anjuman huuñ maiñ

sarv-nashīñ aur haiñ shāḳh-nashīñ gul aur haiñ

qumrī-e-āshiyāñ-ḳharāb bulbul-e-be-vatan huuñ maiñ

ḳhanda-zanāñ haiñ tujh pe go ye ḳhiradān-e-rozgār

ahl-e-ḳhirad meñ ai 'havas' raunaq-e-anjuman huuñ meñ

rang-e-gul-e-shagufta hun aab-e-ruKH-e-chaman hun main

sham-e-haram charagh-e-dair qashqa-e-barahman hun main

kasrat-e-jaur-e-yar se sab hain ye mere juzw-e-tan

soz-o-malal-o-yas-o-dard ranj-o-gham-o-mehan hun main

main hun nasim to bahaar main hun shamim zulf-e-yar

go ki nazar se hun nihan daKHil-e-anjuman hun main

sarw-nashin aur hain shaKH-nashin gul aur hain

qumri-e-ashiyan-KHarab bulbul-e-be-watan hun main

KHanda-zanan hain tujh pe go ye KHiradan-e-rozgar

ahl-e-KHirad mein ai 'hawas' raunaq-e-anjuman hun mein