rang-e-KHizan chaman ki shagufta nazar mein dekh

rang-e-ḳhizāñ chaman kī shagufta nazar meñ dekh

ḳhvābīda zulmateñ haiñ ziyā-e-sahar meñ dekh

kaifiyyat-e-jamāl dil-e-yās asar meñ rakh

jannat simaT ke aa ga.ī merī nazar meñ dekh

mahsūs ho rahī haiñ shuā.eñ sī nuur kī

maiñ jazb ho gayā huuñ tire sang-e-dar meñ dekh

ai ham-nafas haqīqat-e-tūl-e-shab-e-firāq

mujh se na pūchh zindagī-e-muḳhtasar meñ dekh

firdaus-e-mai-kada hai har ik manzar-e-ḳhayāl

Dhaltī huī sharāb kā aalam nazar meñ dekh

mahsūs kar rahā huuñ fareb-e-nigāh ko

raqsāñ tajalliyāñ haiñ mirī chashm-e-tar meñ dekh

har imtihān-e-rāh-e-vafā se guzar chukā

'māhir' kā ab vaqār jahāñ kī nazar meñ dekh

rang-e-KHizan chaman ki shagufta nazar mein dekh

KHwabida zulmaten hain ziya-e-sahar mein dekh

kaifiyyat-e-jamal dil-e-yas asar mein rakh

jannat simaT ke aa gai meri nazar mein dekh

mahsus ho rahi hain shuaen si nur ki

main jazb ho gaya hun tere sang-e-dar mein dekh

ai ham-nafas haqiqat-e-tul-e-shab-e-firaq

mujh se na puchh zindagi-e-muKHtasar mein dekh

firdaus-e-mai-kada hai har ek manzar-e-KHayal

Dhalti hui sharab ka aalam nazar mein dekh

mahsus kar raha hun fareb-e-nigah ko

raqsan tajalliyan hain meri chashm-e-tar mein dekh

har imtihan-e-rah-e-wafa se guzar chuka

'mahir' ka ab waqar jahan ki nazar mein dekh