rang hai nur hai ya sirf dhundalka kya hai

rang hai nuur hai yā sirf dhuñdalkā kyā hai

ḳhvāb-āsā mirī āñkhoñ se guzartā kyā hai

be-qarārī hai ajab dil meñ khaTaktā kyā hai

dasht-e-vahshat hai faqat ye tirī duniyā kyā hai

maiñ huuñ jhoñkā ki koī raah na manzil merī

dasht-o-qarya hai bhaTaknā mujhe merā kyā hai

āfiyat kā koī lamha ho mayassar dil ko

zindagī tujh se mirā aur taqāza kyā hai

vasl ḳhushbū thī havā aa.ī use le ke ga.ī

hijr kī shakl mujassam hai ye sahrā kyā hai

qatl har baar mujhī ko vo kiyā kartā hai

koī batlā.e to āḳhir ye tamāsha kyā hai

kyoñ chamakte haiñ sitāre ye añdhere meñ 'nadīm'

din kā ye shor hai kaisā ye ujālā kyā hai

rang hai nur hai ya sirf dhundalka kya hai

KHwab-asa meri aankhon se guzarta kya hai

be-qarari hai ajab dil mein khaTakta kya hai

dasht-e-wahshat hai faqat ye teri duniya kya hai

main hun jhonka ki koi rah na manzil meri

dasht-o-qarya hai bhaTakna mujhe mera kya hai

aafiyat ka koi lamha ho mayassar dil ko

zindagi tujh se mera aur taqaza kya hai

wasl KHushbu thi hawa aai use le ke gai

hijr ki shakl mujassam hai ye sahra kya hai

qatl har bar mujhi ko wo kiya karta hai

koi batlae to aaKHir ye tamasha kya hai

kyon chamakte hain sitare ye andhere mein 'nadim'

din ka ye shor hai kaisa ye ujala kya hai