rang ka lutf na kuchh ras ka maza

rang kā lutf na kuchh ras kā maza

gul se letī hai sabā mas kā maza

titliyāñ ḳhuub samajhtī haiñ ye baat

rang ke saath gayā ras kā maza

chāñd ne mere chakhāyā mujh ko

ain pūnam meñ amāvas kā maza

zāviye dā.ere sab bhuul ga.e

lag gayā jab se musallas kā maza

bhūltī jaatī hai dhīre dhīre

lomḌī dāvat-e-sāras kā maza

laao bijnaurī sā īmāñ to mile

sher meñ ved-e-muqaddas kā maza

so ga.ī qaum bil-āḳhir 'muztar'

rah gayā muñh pe musaddas kā maza

rang ka lutf na kuchh ras ka maza

gul se leti hai saba mas ka maza

titliyan KHub samajhti hain ye baat

rang ke sath gaya ras ka maza

chand ne mere chakhaya mujh ko

ain punam mein amawas ka maza

zawiye daere sab bhul gae

lag gaya jab se musallas ka maza

bhulti jati hai dhire dhire

lomDi dawat-e-saras ka maza

lao bijnauri sa iman to mile

sher mein wed-e-muqaddas ka maza

so gai qaum bil-aKHir 'muztar'

rah gaya munh pe musaddas ka maza