rang-o-bu ke jahan ke the hi nahin

rang-o-bū ke jahāñ ke the hī nahīñ

is zamīñ āsmāñ ke the hī nahīñ

rāh-o-manzil alag rahe apne

ham kisī kārvāñ ke the hī nahīñ

barq ko bhī rahā yahī afsos

ham kisī āshiyāñ ke the hī nahīñ

ham ne samjhā thā un ko kyoñ apnā

vo jo mehmāñ yahāñ ke the hī nahīñ

manzileñ āsmāñ se aage thiiñ

ham zamān-o-makāñ ke the hī nahīñ

rang-o-bū iḳhtiyār kyoñ karte

phuul is gulsitāñ ke the hī nahīñ

ho ga.e rā.egāñ sabhī sajde

vo jo is āstāñ ke the hī nahīñ

rang-o-bu ke jahan ke the hi nahin

is zamin aasman ke the hi nahin

rah-o-manzil alag rahe apne

hum kisi karwan ke the hi nahin

barq ko bhi raha yahi afsos

hum kisi aashiyan ke the hi nahin

hum ne samjha tha un ko kyon apna

wo jo mehman yahan ke the hi nahin

manzilen aasman se aage thin

hum zaman-o-makan ke the hi nahin

rang-o-bu iKHtiyar kyon karte

phul is gulsitan ke the hi nahin

ho gae raegan sabhi sajde

wo jo is aastan ke the hi nahin