rang-o-bu phul mein kali mein nahin

rang-o-bū phuul meñ kalī meñ nahīñ

husn bhī ab vo chāñdnī meñ nahīñ

ādamiyyat jo aadmī meñ nahīñ

ġham kā ehsās ab kisī meñ nahīñ

zahr-bar-lab har ek gul hai aaj

zindagī phuul kī hañsī meñ nahīñ

bāda-e-intiqām pī pī kar

aadmī jaise aap hī meñ nahīñ

dushmanī kā bhī past hai me'yār

ab bulandī bhī dostī meñ nahīñ

mai-kadoñ meñ hai zikr-e-dair-o-haram

kaif-o-mastī jo mai-kashī meñ nahīñ

ab payām-e-sukūn o rāhat-e-dil

lāla-o-gul kī tāzgī meñ nahīñ

ziist us kī hai ek marg-e-davām

zindagī jis kī zindagī meñ nahīñ

kaun kis kā gila kare 'amjad'

nūr-e-insāniyat kisī meñ nahīñ

rang-o-bu phul mein kali mein nahin

husn bhi ab wo chandni mein nahin

aadamiyyat jo aadmi mein nahin

gham ka ehsas ab kisi mein nahin

zahr-bar-lab har ek gul hai aaj

zindagi phul ki hansi mein nahin

baada-e-intiqam pi pi kar

aadmi jaise aap hi mein nahin

dushmani ka bhi past hai me'yar

ab bulandi bhi dosti mein nahin

mai-kadon mein hai zikr-e-dair-o-haram

kaif-o-masti jo mai-kashi mein nahin

ab payam-e-sukun o rahat-e-dil

lala-o-gul ki tazgi mein nahin

zist us ki hai ek marg-e-dawam

zindagi jis ki zindagi mein nahin

kaun kis ka gila kare 'amjad'

nur-e-insaniyat kisi mein nahin