رنگ اس کا بدلنے والا ہے

رنگ اس کا بدلنے والا ہے

نیا سورج نکلنے والا ہے

موت کی اوٹ میں نہ ہو جاؤں

پھر کوئی تیر چلنے والا ہے

بھوک پیٹوں میں سرسرانے لگی

سانپ انساں نگلنے والا ہے

ساری خلقت ہے آج سہمی ہوئی

کوئی لاوا ابلنے والا ہے

کب یہ ممکن ہے سچ نہ کھل پائے

کب یہ طوفان ٹلنے والا ہے

اس کو اپنوں کی کیا خبر ہے کہ جو

در پہ غیروں کے پلنے والا ہے

اپنے ہی گھر کی فکر ہے سب کو

شہر تو سارا جلنے والا ہے

جس کے ہونٹوں پہ جھوٹ رہتا تھا

آخرش سچ اگلنے والا ہے