rang ye hai ab hamare ishq ki tasir ka

rañg ye hai ab hamāre ishq kī tāsīr kā

husn ā.īna banā hai dard kī tasvīr kā

ek arsa ho gayā farhād ko guzre hue

aao phir taaza kareñ afsāna jū-e-shīr kā

gulsitāñ kā zarra zarra jaag uThe andalīb

lutf hai is vaqt tere nāla-e-shab-gīr kā

lījiye ai shaiḳh pahle apne īmāñ kī ḳhabar

dījiye phir shauq se fatvā mirī takfīr kā

ḳhvāb-e-hastī ko samajhne ke liye bechain huuñ

e'tibār aatā nahīñ mujh ko kisī tābīr kā

jis ne dī āḳhir ġhurūr-e-husn-e-yūsuf ko shikast

allāh allāh hausla is dast-e-dāman-gīr kā

toḌ kar nikle qafas to gum thī rāh-e-āshiyāñ

vo amal tadbīr kā thā ye amal taqdīr kā

go zamāna ho gayā gulzār se nikle hue

hai mizāj ab tak vahī 'raihāni' dil-gīr kā

rang ye hai ab hamare ishq ki tasir ka

husn aaina bana hai dard ki taswir ka

ek arsa ho gaya farhad ko guzre hue

aao phir taza karen afsana ju-e-shir ka

gulsitan ka zarra zarra jag uThe andalib

lutf hai is waqt tere nala-e-shab-gir ka

lijiye ai shaiKH pahle apne iman ki KHabar

dijiye phir shauq se fatwa meri takfir ka

KHwab-e-hasti ko samajhne ke liye bechain hun

e'tibar aata nahin mujh ko kisi tabir ka

jis ne di aaKHir ghurur-e-husn-e-yusuf ko shikast

allah allah hausla is dast-e-daman-gir ka

toD kar nikle qafas to gum thi rah-e-ashiyan

wo amal tadbir ka tha ye amal taqdir ka

go zamana ho gaya gulzar se nikle hue

hai mizaj ab tak wahi 'raihani' dil-gir ka