rangini-e-hayat ke manzar se dur hai

rañgīni-e-hayāt ke manzar se duur hai

dil apnā raushnī-e-muqaddar se duur hai

ye sach hai koī dost nahīñ zindagī ke saath

ye kyā hai kam ki fitna-e-mahshar se duur hai

alfāz kā mahaktā hai gul-dān har ghaḌī

afkār kā ujālā magar sar se duur hai

gumrāhiyoñ se us ko bachā le ḳhudā-e-pāk

ye qaum aaj dars-e-payambar se duur hai

maiñ apnā haath sū-e-falak to baḌhā.e huuñ

ye aur baat hai mah-o-aḳhtar se duur hai

mazdūr huuñ maiñ kartā huuñ mehnat tamām din

ḳhush-hālī phir bhī mere muqaddar se duur hai

'darvesh' apnī zaat se tum kyoñ ho mutma.in

kyā gardish-e-hayāt ke tevar se duur hai

rangini-e-hayat ke manzar se dur hai

dil apna raushni-e-muqaddar se dur hai

ye sach hai koi dost nahin zindagi ke sath

ye kya hai kam ki fitna-e-mahshar se dur hai

alfaz ka mahakta hai gul-dan har ghaDi

afkar ka ujala magar sar se dur hai

gumrahiyon se us ko bacha le KHuda-e-pak

ye qaum aaj dars-e-payambar se dur hai

main apna hath su-e-falak to baDhae hun

ye aur baat hai mah-o-aKHtar se dur hai

mazdur hun main karta hun mehnat tamam din

KHush-haali phir bhi mere muqaddar se dur hai

'darwesh' apni zat se tum kyon ho mutmain

kya gardish-e-hayat ke tewar se dur hai