rangon ki barsat thi kaisi phagan mein

rangoñ kī barsāt thī kaisī phāgan meñ

phuul khile the kalī kalī ghar āñgan meñ

ab tak us kī yaad meñ tan-man jaltā hai

dhokā mujh ko jis ne diyā thā sāvan meñ

janam maran kā chakkar kab puurā hogā

sadiyāñ biit ga.ī haiñ aavan jāvan meñ

āñkheñ nis-din niir bahātī rahtī haiñ

aag lagī hai kaisī mere tan-man meñ

us kā badan to ā.īnoñ ko sharmā.e

kyoñ vo mukhḌā dekh rahī thī darpan meñ

jal-thal jal-thal umaḌ ghumaḌ barse bādal

pyaas miTī nahīñ phir bhī merī sāvan meñ

kaun ujāle le kar mere ghar aaya

dhuup utar aa.ī hai mere āñgan meñ

jab chāhegī phan ko uThā kar Das legī

amrit paa.e kaise koī nāgan meñ

badal ga.e āseboñ meñ vo chehre kyoñ

dekhe jin ke ḳhvāb suhāne bachpan meñ

Dar aur zulm kā yaaro koī ant nahīñ

ḳhud ko DhūñD rahe haiñ log ab rāvan meñ

'raaj bahut mushkil hai lenā sukh kā saañs

dukh ne aisā jakaḌ liyā hai bandhan meñ

rangon ki barsat thi kaisi phagan mein

phul khile the kali kali ghar aangan mein

ab tak us ki yaad mein tan-man jalta hai

dhoka mujh ko jis ne diya tha sawan mein

janam maran ka chakkar kab pura hoga

sadiyan bit gai hain aawan jawan mein

aankhen nis-din nir bahati rahti hain

aag lagi hai kaisi mere tan-man mein

us ka badan to aainon ko sharmae

kyon wo mukhDa dekh rahi thi darpan mein

jal-thal jal-thal umaD ghumaD barse baadal

pyas miTi nahin phir bhi meri sawan mein

kaun ujale le kar mere ghar aaya

dhup utar aai hai mere aangan mein

jab chahegi phan ko uTha kar Das legi

amrit pae kaise koi nagan mein

badal gae aasebon mein wo chehre kyon

dekhe jin ke KHwab suhane bachpan mein

Dar aur zulm ka yaro koi ant nahin

KHud ko DhunD rahe hain log ab rawan mein

'raj bahut mushkil hai lena sukh ka sans

dukh ne aisa jakaD liya hai bandhan mein