ranj aur ranj bhi tanhai ka

ranj aur ranj bhī tanhā.ī kā

vaqt pahuñchā mirī rusvā.ī kā

umr shāyad na kare aaj vafā

kāTnā hai shab-e-tanhā.ī kā

tum ne kyuuñ vasl meñ pahlū badlā

kis ko da.avā hai shakebā.ī kā

ek din raah pe jā pahuñche ham

shauq thā bādiya-paimā.ī kā

us se nādān hī ban kar miliye

kuchh ijāra nahīñ dānā.ī kā

saat pardoñ meñ nahīñ Thairtī aañkh

hausla kyā hai tamāshā.ī kā

darmiyāñ pā-e-nazar hai jab tak

ham ko da.avā nahīñ bīnā.ī kā

kuchh to hai qadr tamāshā.ī kī

hai jo ye shauq ḳhud-ārā.ī kā

us ko chhoḌā to hai lekin ai dil

mujh ko Dar hai tirī ḳhud-rā.ī kā

bazm-e-dushman meñ na jī se utrā

pūchhnā kyā tirī zebā.ī kā

yahī anjām thā ai fasl-e-ḳhizāñ

gul o bulbul kī shanāsā.ī kā

madad ai jazba-e-taufīq ki yaañ

ho chukā kaam tavānā.ī kā

mohtasib uzr bahut haiñ lekin

izn ham ko nahīñ goyā.ī kā

hoñge 'hālī' se bahut āvāra

ghar abhī duur hai rusvā.ī kā

ranj aur ranj bhi tanhai ka

waqt pahuncha meri ruswai ka

umr shayad na kare aaj wafa

kaTna hai shab-e-tanhai ka

tum ne kyun wasl mein pahlu badla

kis ko dawa hai shakebai ka

ek din rah pe ja pahunche hum

shauq tha baadiya-paimai ka

us se nadan hi ban kar miliye

kuchh ijara nahin danai ka

sat pardon mein nahin Thairti aankh

hausla kya hai tamashai ka

darmiyan pa-e-nazar hai jab tak

hum ko dawa nahin binai ka

kuchh to hai qadr tamashai ki

hai jo ye shauq KHud-arai ka

us ko chhoDa to hai lekin ai dil

mujh ko Dar hai teri KHud-rai ka

bazm-e-dushman mein na ji se utra

puchhna kya teri zebai ka

yahi anjam tha ai fasl-e-KHizan

gul o bulbul ki shanasai ka

madad ai jazba-e-taufiq ki yan

ho chuka kaam tawanai ka

mohtasib uzr bahut hain lekin

izn hum ko nahin goyai ka

honge 'haali' se bahut aawara

ghar abhi dur hai ruswai ka