ranj ke hathon git KHushi ke likhwao to baat bane

rañj ke hāthoñ giit ḳhushī ke likhvāo to baat bane

toḌ ke ashkoñ kī zanjīreñ muskāo to baat bane

shor machātī āvāzoñ se toḌ ke rishta pal-do-pal

ḳhāmoshī kī sargoshī gar sun paao to baat bane

gulshan meñ to ḳhushbū har-sū rahtī hī hai gul-rut meñ

sahrāoñ meñ jānāñ ġhunche mahkāo to baat bane

mujh ko hiir sayāl se matlab aur na rāñjhe se kuchh kaam

toḌ ke bandhan rasmoñ kā tum aa jaao to baat bane

baat vafā kī dil vāloñ kī nagrī meñ hai aam bahut

shahr-e-butāñ meñ giit vafā ke gā paao to baat bane

god meñ ḳhushiyoñ kī har koī chain se sotā hai lekin

muuñd ke āñkheñ ġham bāñhoñ meñ lahrāo to baat bane

chāñd sitāre toḌ ke laanā afsānoñ kī bāteñ haiñ

mere liye to pyaar nazar meñ bhar laao to baat bane

ranj ke hathon git KHushi ke likhwao to baat bane

toD ke ashkon ki zanjiren muskao to baat bane

shor machati aawazon se toD ke rishta pal-do-pal

KHamoshi ki sargoshi gar sun pao to baat bane

gulshan mein to KHushbu har-su rahti hi hai gul-rut mein

sahraon mein jaanan ghunche mahkao to baat bane

mujh ko hir sayal se matlab aur na ranjhe se kuchh kaam

toD ke bandhan rasmon ka tum aa jao to baat bane

baat wafa ki dil walon ki nagri mein hai aam bahut

shahr-e-butan mein git wafa ke ga pao to baat bane

god mein KHushiyon ki har koi chain se sota hai lekin

mund ke aankhen gham banhon mein lahrao to baat bane

chand sitare toD ke lana afsanon ki baaten hain

mere liye to pyar nazar mein bhar lao to baat bane