ranj-o-gham jitne hain un ko kala pani bhej de

ranj-o-ġham jitne haiñ un ko kaalā paanī bhej de

ai ḳhudā tū mere ghar meñ shādmānī bhej de

maiñ bhī ab hijrat karūñgā aur faqat tere liye

mujh ko bhī parvāna-e-naql-e-makānī bhej de

zulmateñ fir.aun ban kar chhā ga.ī haiñ har taraf

dast-e-mūsā kī tarah ujlī nishānī bhej de

phir nayā vo abraha ka.abe ko Dhāne aa gayā

phir abābīloñ kā lashkar kāmrānī bhej de

ātishīñ mausam jalā degā ye saarī bastiyāñ

kam se kam mere nagar meñ rut suhānī bhej de

al-atash chillā rahe haiñ saare hī pīr-o-javāñ

abr-e-bārāñ bhej de rahmat kā paanī bhej de

kuchh nahīñ qismat meñ lekin qādir-e-mutlaq hai tū

daulat-e-duniyā kahīñ se nā-gahānī bhej de

gosh-bar-āvāz ho kar sun rahā huuñ maiñ baġhaur

muntazir huuñ ik nidā-e-āsmānī bhej de

maiñ bhī terī hamd meñ ash.ār kuchh to kah sakūñ

muntaḳhab alfāz de husn-e-ma.ānī bhej de

ye bhī ronā koī ronā hai bhalā 'muḳhtār' kā

dīda-e-tar ke liye ab ḳhūñ-fishānī bhej de

ranj-o-gham jitne hain un ko kala pani bhej de

ai KHuda tu mere ghar mein shadmani bhej de

main bhi ab hijrat karunga aur faqat tere liye

mujh ko bhi parwana-e-naql-e-makani bhej de

zulmaten firaun ban kar chha gai hain har taraf

dast-e-musa ki tarah ujli nishani bhej de

phir naya wo abraha kabe ko Dhane aa gaya

phir ababilon ka lashkar kaamrani bhej de

aatishin mausam jala dega ye sari bastiyan

kam se kam mere nagar mein rut suhani bhej de

al-atash chilla rahe hain sare hi pir-o-jawan

abr-e-baran bhej de rahmat ka pani bhej de

kuchh nahin qismat mein lekin qadir-e-mutlaq hai tu

daulat-e-duniya kahin se na-gahani bhej de

gosh-bar-awaz ho kar sun raha hun main baghaur

muntazir hun ek nida-e-asmani bhej de

main bhi teri hamd mein ashaar kuchh to kah sakun

muntaKHab alfaz de husn-e-maani bhej de

ye bhi rona koi rona hai bhala 'muKHtar' ka

dida-e-tar ke liye ab KHun-fishani bhej de