ranj-o-gham-o-firaq mein jo mubtala nahin

ranj-o-ġham-o-firāq meñ jo mubtalā nahīñ

duniyā meñ us kī ziist kā kuchh bhī mazā nahīñ

le lo qasam ki ham ne tumhāre sivā sanam

is naqd-e-dil ko aur kisī ko diyā nahīñ

ai dil butoñ ke ishq ne barbād kar diyā

varna jahāñ meñ ham sā koī bā-vafā nahīñ

bilkul durust ye ki butoñ meñ vafā kahāñ

un se to dil lagāne kā kuchh bhī mazā nahīñ

paa.ī sazā ḳharāb hue ishq kyoñ kiyā

ye sab ḳhatā hai dil kī hamārī ḳhatā nahīñ

dam laakh us ke ishq kā bharte rahe magar

phir bhī kisī kā vo kabhī dil-āshnā nahīñ

insāf merā aur tirā hogā ek din

vo kaun sā sitam hai jo mujh par kiyā nahīñ

māshūq-e-pur-jafā se maiñ nā-chār ho gayā

is ġham se chhūTtā magar aatī qazā nahīñ

āh-o-fuġhāñ se fā.eda kuchh bhī nahīñ 'azīz'

ye but haiñ sang-dil inheñ ḳhauf-e-ḳhudā nahīñ

ranj-o-gham-o-firaq mein jo mubtala nahin

duniya mein us ki zist ka kuchh bhi maza nahin

le lo qasam ki hum ne tumhaare siwa sanam

is naqd-e-dil ko aur kisi ko diya nahin

ai dil buton ke ishq ne barbaad kar diya

warna jahan mein hum sa koi ba-wafa nahin

bilkul durust ye ki buton mein wafa kahan

un se to dil lagane ka kuchh bhi maza nahin

pai saza KHarab hue ishq kyon kiya

ye sab KHata hai dil ki hamari KHata nahin

dam lakh us ke ishq ka bharte rahe magar

phir bhi kisi ka wo kabhi dil-ashna nahin

insaf mera aur tera hoga ek din

wo kaun sa sitam hai jo mujh par kiya nahin

mashuq-e-pur-jafa se main na-chaar ho gaya

is gham se chhuTta magar aati qaza nahin

aah-o-fughan se faeda kuchh bhi nahin 'aziz'

ye but hain sang-dil inhen KHauf-e-KHuda nahin