ranj-o-gham sahe kab tak mujh sa na-tawan tanha

ranj-o-ġham sahe kab tak mujh sā nā-tavāñ tanhā

maiñ hī rah gayā huuñ kyā zer-e-āsmāñ tanhā

is adā se karte haiñ zikr hazrat-e-vā.iz

jaise aap hī to haiñ mālik-e-jināñ tanhā

ek hū kā aalam hai gul hai aur na ġhunche haiñ

kyā karegā gulshan meñ rah ke bāġhbāñ tanhā

ab vatan kī quvvat kā haal pūchhte kyā ho

ek ek lashkar hai ek ik javāñ tanhā

āsmāñ ke taare hoñ yā zamīñ ke zarre hoñ

maiñ sunā.ūñ kis kis ko apnī dāstāñ tanhā

un kī yaad hai dil meñ un kī shakl āñkhoñ meñ

un se chhūTne par bhī maiñ rahā kahāñ tanhā

pīchhe rah ga.e thak kar ahl-e-kārvāñ saare

hai ravāñ sū-e-manzil mīr-e-kārvāñ tanhā

āshiyāñ ke jalte hī āshiyāñ banātā huuñ

maiñ faqat samajhtā huuñ barq kī zabāñ tanhā

ai 'sa.īd' qismat ko ye bhī din dikhānā thā

aaj apnī hālat par maiñ huuñ nauha-ḳhvāñ tanhā

ranj-o-gham sahe kab tak mujh sa na-tawan tanha

main hi rah gaya hun kya zer-e-asman tanha

is ada se karte hain zikr hazrat-e-waiz

jaise aap hi to hain malik-e-jinan tanha

ek hu ka aalam hai gul hai aur na ghunche hain

kya karega gulshan mein rah ke baghban tanha

ab watan ki quwwat ka haal puchhte kya ho

ek ek lashkar hai ek ek jawan tanha

aasman ke tare hon ya zamin ke zarre hon

main sunaun kis kis ko apni dastan tanha

un ki yaad hai dil mein un ki shakl aankhon mein

un se chhuTne par bhi main raha kahan tanha

pichhe rah gae thak kar ahl-e-karwan sare

hai rawan su-e-manzil mir-e-karwan tanha

aashiyan ke jalte hi aashiyan banata hun

main faqat samajhta hun barq ki zaban tanha

ai 'said' qismat ko ye bhi din dikhana tha

aaj apni haalat par main hun nauha-KHwan tanha