ranj-o-rahat ke manazir hain zamane humse

ranj-o-rāhat ke manāzir haiñ zamāne ham se

naġhma ham se hai fuġhāñ ham se tarāne ham se

ham ne sachchā.ī se suulī ko atā kī azmat

ya.anī haq-goī ke zinda haiñ fasāne ham se

ye kudūrat ke pujārī ye ta.assub ke naqīb

aa ke le jaa.eñ mohabbat ke ḳhazāne ham se

ham ne bujhne na diye ishq-o-mohabbat ke charāġh

raushnī paa.ī hai duniyā-e-vafā ne ham se

apne siine meñ liye baiThe haiñ ḳhurshīd-jamāl

kyā milā.eñge nazar ā.ina-ḳhāne ham se

haram-o-dair se nākām palaTne vaale

pūchhte haiñ tire milne ke Thikāne ham se

sab hameñ kahte haiñ dīvāna-e-ulfat 'mūsā'

gulshan ābād haiñ sahrā haiñ suhāne ham se

ranj-o-rahat ke manazir hain zamane hum se

naghma hum se hai fughan hum se tarane hum se

hum ne sachchai se suli ko ata ki azmat

yani haq-goi ke zinda hain fasane hum se

ye kudurat ke pujari ye tassub ke naqib

aa ke le jaen mohabbat ke KHazane hum se

hum ne bujhne na diye ishq-o-mohabbat ke charagh

raushni pai hai duniya-e-wafa ne hum se

apne sine mein liye baiThe hain KHurshid-jamal

kya milaenge nazar aaina-KHane hum se

haram-o-dair se nakaam palaTne wale

puchhte hain tere milne ke Thikane hum se

sab hamein kahte hain diwana-e-ulfat 'musa'

gulshan aabaad hain sahra hain suhane hum se