ranj-o-rahat wasl-o-furqat hosh-o-wahshat kya nahin

rañj-o-rāhat vasl-o-furqat hosh-o-vahshat kyā nahīñ

kaun kahtā hai ki rahne kī jagah duniyā nahīñ

ahl-e-ġham tum ko mubārak ye fanā āmādgī

lekin īsār-e-mohabbat jaan de denā nahīñ

husn sar-tā-pā tamannā ishq sar-tā-sar ġhurūr

is kā andāza niyāz-o-nāz se hotā nahīñ

ek hālat par zamāne meñ na guzrī ishq kī

dard kī duniyā bhī ab vo dard kī duniyā nahīñ

jis ke sho.aloñ se thī kal tak garmī-e-bazm-e-hayāt

aaj is ḳhākistar-e-dil se dhuāñ uThtā nahīñ

maiñ adam andar adam maiñ huuñ jahāñ andar jahāñ

ek hī duniyā ho merī ai 'firāq' aisā nahīñ

ranj-o-rahat wasl-o-furqat hosh-o-wahshat kya nahin

kaun kahta hai ki rahne ki jagah duniya nahin

ahl-e-gham tum ko mubarak ye fana aamadgi

lekin isar-e-mohabbat jaan de dena nahin

husn sar-ta-pa tamanna ishq sar-ta-sar ghurur

is ka andaza niyaz-o-naz se hota nahin

ek haalat par zamane mein na guzri ishq ki

dard ki duniya bhi ab wo dard ki duniya nahin

jis ke shoalon se thi kal tak garmi-e-bazm-e-hayat

aaj is KHakistar-e-dil se dhuan uThta nahin

main adam andar adam main hun jahan andar jahan

ek hi duniya ho meri ai 'firaq' aisa nahin