ranjish teri har dam ki gawara na karenge

ranjish tirī har dam kī gavārā na kareñge

ab aur hī māshūq se yārāna kareñge

bāñdheñge kisī aur hī joḌe kā tasavvur

sar dhyān meñ us zulf ke maarā na kareñge

imkān se ḳhārij hai ki huuñ tujh se muḳhātib

hamnām ko bhī tere pukārā na kareñge

yak baar kabhī bhūle se aa jaa.eñ to aa jaa.eñ

lekin guzar is ghar meñ dobārā na kareñge

kyā ḳhuub kahā tū ne jo kholūñ abhī āġhosh

milne se mire aap kinārā na kareñge

go ḳhaak meñ mil jaa.eñ ham aur vaz.a badal jaa.eñ

par tujh se mulāqāt ḳhud-ārā na kareñge

us nargis-e-'bīmār' se rakhte haiñ shabāhat

hargiz sū-e-ab.har bhī ishārā na kareñge

ranjish teri har dam ki gawara na karenge

ab aur hi mashuq se yarana karenge

bandhenge kisi aur hi joDe ka tasawwur

sar dhyan mein us zulf ke mara na karenge

imkan se KHarij hai ki hun tujh se muKHatib

hamnam ko bhi tere pukara na karenge

yak bar kabhi bhule se aa jaen to aa jaen

lekin guzar is ghar mein dobara na karenge

kya KHub kaha tu ne jo kholun abhi aaghosh

milne se mere aap kinara na karenge

go KHak mein mil jaen hum aur waza badal jaen

par tujh se mulaqat KHud-ara na karenge

us nargis-e-'bimar' se rakhte hain shabahat

hargiz su-e-abhar bhi ishaara na karenge