ranjishon ne jazba-e-iKHlas garmaya bhi hai

ranjishoñ ne jazba-e-iḳhlās garmāyā bhī hai

dostī meñ ham ne kuchh khoyā hai kuchh paayā bhī hai

ik zarā sī baat par kyuuñ kar ta.alluq toḌ duuñ

vo purānā yaar bhī hai merā ham-sāya bhī hai

is taraf dekhā to hai be-shak hiqārat se sahī

shukr hai itnā karam to is ne farmāyā bhī hai

yuuñ to kuchh qīmat nahīñ jins-e-vafā kī haañ magar

jis qadar arzāñ hai ye itnī garāñ-māya bhī hai

sair phir bhī ho nahīñ paayā dil-e-īzā-talab

vaqt ne jī bhar ke go us par sitam Dhāyā bhī hai

hijr kī shab aur yādoñ kī surūr-āgīñ phuvār

kuchh to dil kī be-qarārī ko qarār aayā bhī hai

laakh maujoñ kī balā-ḳhezī ne kī khilvāḌ bhī

us ne kashtī ko magar sāhil pe pahuñchāyā bhī hai

phir bhī yārab kyā milegā hāsidoñ ke shahr meñ

taaj to shohrat kā tū ne mujh ko pahnāyā bhī hai

kyuuñ na 'chāñd' apnī anā ko jaan se rakhūñ aziiz

ye mirā īmān bhī hai merā sarmāya bhī hai

ranjishon ne jazba-e-iKHlas garmaya bhi hai

dosti mein hum ne kuchh khoya hai kuchh paya bhi hai

ek zara si baat par kyun kar talluq toD dun

wo purana yar bhi hai mera ham-saya bhi hai

is taraf dekha to hai be-shak hiqarat se sahi

shukr hai itna karam to is ne farmaya bhi hai

yun to kuchh qimat nahin jins-e-wafa ki han magar

jis qadar arzan hai ye itni garan-maya bhi hai

sair phir bhi ho nahin paya dil-e-iza-talab

waqt ne ji bhar ke go us par sitam Dhaya bhi hai

hijr ki shab aur yaadon ki surur-agin phuwar

kuchh to dil ki be-qarari ko qarar aaya bhi hai

lakh maujon ki bala-KHezi ne ki khilwaD bhi

us ne kashti ko magar sahil pe pahunchaya bhi hai

phir bhi yarab kya milega hasidon ke shahr mein

taj to shohrat ka tu ne mujh ko pahnaya bhi hai

kyun na 'chand' apni ana ko jaan se rakhun aziz

ye mera iman bhi hai mera sarmaya bhi hai