raqs-e-ilham kar raha hun

raqs-e-ilhām kar rahā huuñ

maiñ jism kalām kar rahā huuñ

merī hai jo ḳhaas apnī miTTī

us ḳhaas ko aam kar rahā huuñ

ik mushkil-e-saḳht aa paḌī hai

ik sub.h ko shaam kar rahā huuñ

duniyā se kaho zarā sā Thahre

is vaqt ārām kar rahā huuñ

chup-chāp paḌā huā huuñ ghar meñ

aur shahr meñ naam kar rahā huuñ

miTTī ko palaT rahā huuñ apnī

puḳhta ko ḳhaam kar rahā huuñ

kyā kaam hai jānñā hai mujh ko

ik sirf ye kaam kar rahā huuñ

be-rabtī-e-jism-o-jāñ fuzūñ-tar

tauhīn-e-nizām kar rahā huuñ

ḳhushbū-e-ḳhudā lagā ke ḳhud par

maz.hab ko harām kar rahā huuñ

īmān ne kuchh sunī na merī

so kufr pe kaam kar rahā huuñ

allāh-miyāñ ke mashvare se

tark-e-islām kar rahā huuñ

ai zindabād farhat-ehsās

maiñ tujh ko salām kar rahā huuñ

raqs-e-ilham kar raha hun

main jism kalam kar raha hun

meri hai jo KHas apni miTTi

us KHas ko aam kar raha hun

ek mushkil-e-saKHt aa paDi hai

ek subh ko sham kar raha hun

duniya se kaho zara sa Thahre

is waqt aaram kar raha hun

chup-chap paDa hua hun ghar mein

aur shahr mein nam kar raha hun

miTTi ko palaT raha hun apni

puKHta ko KHam kar raha hun

kya kaam hai jaanna hai mujh ko

ek sirf ye kaam kar raha hun

be-rabti-e-jism-o-jaan fuzun-tar

tauhin-e-nizam kar raha hun

KHushbu-e-KHuda laga ke KHud par

mazhab ko haram kar raha hun

iman ne kuchh suni na meri

so kufr pe kaam kar raha hun

allah-miyan ke mashware se

tark-e-islam kar raha hun

ai zindabaad farhat-ehsas

main tujh ko salam kar raha hun