raqs karte hain meri aankh mein manzar kya kya

raqs karte haiñ mirī aañkh meñ manzar kyā kyā

dekhtā rahtā huuñ maiñ ḳhvāb ke bāhar kyā kyā

vaqt zālim ne bhulā diiñ hameñ kaisī bāteñ

haa.e maazī ke ḳhazīne meñ the gauhar kyā kyā

ik tire naam kā aanā thā zabāñ par aur bas

ham pe barse haiñ har ik samt se patthar kyā kyā

ghar se bāhar ko nikalnā bhī to ghar aanā bhī

din guzarte haiñ mire rañj uThā kar kyā kyā

ab jo aa pahuñche haiñ tujh tak to nahīñ kahte ham

raah meñ khaa.ī hai ushshāq ne Thokar kyā kyā

ek arsa huā dekhā hī nahīñ us jānib

jaane tabdīl huā hai mire bhītar kyā kyā

jaane kyā kaifiyyat-e-dil hai hamārī imroz

naam rakkhe haiñ junūñ kaif badal kar kyā kyā

raqs karte hain meri aankh mein manzar kya kya

dekhta rahta hun main KHwab ke bahar kya kya

waqt zalim ne bhula din hamein kaisi baaten

hae mazi ke KHazine mein the gauhar kya kya

ek tere nam ka aana tha zaban par aur bas

hum pe barse hain har ek samt se patthar kya kya

ghar se bahar ko nikalna bhi to ghar aana bhi

din guzarte hain mere ranj uTha kar kya kya

ab jo aa pahunche hain tujh tak to nahin kahte hum

rah mein khai hai ushshaq ne Thokar kya kya

ek arsa hua dekha hi nahin us jaanib

jaane tabdil hua hai mere bhitar kya kya

jaane kya kaifiyyat-e-dil hai hamari imroz

nam rakkhe hain junun kaif badal kar kya kya