رقص کرتی جا رہی ہے نیم عریانی ہوا

رقص کرتی جا رہی ہے نیم عریانی ہوا

موہ لیتی ہے دل انسان شیطانی ہوا

ثبت کرتی ہے نشاں ہونٹوں کے غنچوں پر کبھی

ذہن کی ڈالی کو سہلاتی ہے رومانی ہوا

کالے کوسوں سے گزر کر بستیوں میں ٹھہر کر

تازگی دیتی رہی ہے سب کو مستانی ہوا

دشت و بستی کے عمل سے ہے یہ واقف اس لئے

دشت پر برسا کے جاتی ہے سدا پانی ہوا

خشک جھیلیں ہیں کہیں پر ہے کہیں تپتی زمیں

اور کہیں سیلاب لاتی ہے یہ طوفانی ہوا

بخش دیتی ہے کسی کو زندگانی اور پھر

روٹھ جاتی ہے کسی کے تن سے دیوانی ہوا

زر ہے جب تک ساتھ رہتی ہے قمرؔ یہ شوق سے

مفلسی میں روٹھ جائے جانی پہچانی ہوا