raqs karti ja rahi hai nim-uryani hawa

raqs kartī jā rahī hai nīm-uryānī havā

moh letī hai dil-e-insān shaitānī havā

sabt kartī hai nishāñ hoñToñ ke ġhunchoñ par kabhī

zehn kī Daalī ko sahlātī hai rūmānī havā

kaale kosoñ se guzar kar bastiyoñ meñ Thahr kar

tāzgī detī rahī hai sab ko mastānī havā

dasht-o-bastī ke amal se hai ye vāqif is liye

dasht par barsā ke jaatī hai sadā paanī havā

ḳhushk jhīleñ haiñ kahīñ par hai kahīñ taptī zamīñ

aur kahīñ sailāb laatī hai ye tūfānī havā

baḳhsh detī hai kisī ko zindagānī aur phir

ruuTh jaatī hai kisī ke tan se dīvānī havā

zar hai jab tak saath rahtī hai 'qamar' ye shauq se

muflisī meñ ruuTh jaa.e jānī-pahchānī havā

raqs karti ja rahi hai nim-uryani hawa

moh leti hai dil-e-insan shaitani hawa

sabt karti hai nishan honTon ke ghunchon par kabhi

zehn ki Dali ko sahlati hai rumani hawa

kale koson se guzar kar bastiyon mein Thahr kar

tazgi deti rahi hai sab ko mastani hawa

dasht-o-basti ke amal se hai ye waqif is liye

dasht par barsa ke jati hai sada pani hawa

KHushk jhilen hain kahin par hai kahin tapti zamin

aur kahin sailab lati hai ye tufani hawa

baKHsh deti hai kisi ko zindagani aur phir

ruTh jati hai kisi ke tan se diwani hawa

zar hai jab tak sath rahti hai 'qamar' ye shauq se

muflisi mein ruTh jae jaani-pahchani hawa