رقص میں جب بھی جام آتے ہیں

رقص میں جب بھی جام آتے ہیں

راحتوں کے پیام آتے ہیں

غم کی دولت سنبھال کر رکھو

غم بھی الفت میں کام آتے ہیں

ٹوٹ جاتی ہے خود بہ خود توبہ

جب بھی لمحات شام آتے ہیں

مسکراتے ہیں پھول خوش ہو کر

کون یہ خوش خرام آتے ہیں

بے وفائی کا ذکر سن سن کر

لب پہ یاروں کے نام آتے ہیں

شیخ پیتا نہیں مگر اس کو

مے کی قسموں کے نام آتے ہیں

جب بھی آتے ہیں میرے ہونٹوں پر

مہوشوں ہی کے نام آتے ہیں

معبدوں میں بھی مجھ کو اے عابدؔ

مے کدوں سے سلام آتے ہیں